• 
• 

Werner Jungjohann

 

Afscheed vun Werner Jungjohann

 

Am 4. August is de fröhere, johrelange Vörsitter un Ehrenvörsiter vun de Schleswiger Speeldeel,

 

Werner Jungjohann,

 

in sien 85. Levensjohr inslaapen.

 

Veele Minschen hebben em kennt und köönt sik wiss ok noch op em besinn. He weer för veele de plattdüütsche Theoterspeeler in Schleswig. He hörer eenfach to de Stadt. Mit Theoterspeelen hett he in Schleswig 1954 anfungen, dormols heete de Bühne »Plattdeutsche Komödie Schleswig”,  düsse Bühne wöör denn 1959 ümnömt in »Niederdeutsche Heirnatbühne Schleswig“. 1961 hett Werner Jungjohann tosamen mit´n Handvull annere Theoterspeelers de “Schleswiger Speeldeel“ grünnt un hett över 25 Johr as Vörsitter dat Leit vun de Speeldeel hat. He hett bit 1994 in wied över 50 Theoterstücken mitspeelt. He hett wull meist alle Aarten vun Minschen in sein Theoterleven dorstellt.

 

Unvergeeten sünd siene Rulln in:

“Mit Em op du un du” (1964)
“De hillige Grootmudder” (1971 u. 1981)
“Brand-Stiftung” (1975)
“Kramer Kray” (1983)
“Vun Müüs un Minschen” (1986)
“Teihn Johr un dree Daag” (1988)
“Verlorn Tieden” (1990)

 

Sien letzte Rull, de he sik ton Afscheed vun dat aktive Theoterspeelen wünscht harr, weer de Hauptrull in de Komödie “Snieder Nörig“ (1994).

 

Neben sien groote Engagement as Theoterspeeler hett he sik ok truut un hett bi manche Stücken Regie föhrt. Werner hett sik ok dorför insett, dat bi de Speeldeel nich blots Komödien un Schwänke speelt warrt, heel wichtig weer em jümners, dat ok irnsthaftige Stücke mit in´t Programm kaamen sünd.
Man, dat gröttste Verdeenst vun “uns Werner” (so is he vun meist alle Minschen nöömt wurrn) weer sien besünnere Aart un Wies, mit de he so veele Johrn de Schleswiger Speeldeel as Vörsitter föhrt hett. He harr een Aart, de weer eenmolig hartlich, fründlich un jümmers positiv. Man musse em eenfach girn un ok leev hebben.

 

Utdruck för dat Verdeenst üm de plattdüütsche Spraak is ja ok, dat Werner Jungjohann all 1987 mit dat “Verdienstkreuz am Bande des Verdienstordens der Bundesrepublik Deutschland“ utteekent wurrn is.

 

De heele Schleswiger Schleswiger Speeldeel truert üm “ehr‘n Werner“. Ahn em weer de Speeldeel nich dat, wat se hüüt is. Werner Jungjohann is nich mehr op düsse Eer, man in de Schleswiger Speeldeel warrt he wieder leven.

 

Volker Schwarz

 

Hier kann man Werner in een poor vun siene veelen Rullen sehn

 

torüch